Kontrolli i Lartë i Shtetit (KLSH) ka evidentuar se për siguracionin e jetës dhe shëndetit të anëtarëve të Komisionit të Pavarur të Kualifikimit (KPK) u kontraktuan rreth 46,4 milionë lekë pa TVSH, afërsisht 500 mijë euro.
Shifra përmendet në Auditin e Përputhshmërisë të KLSH për KPK-në, shkallën e parë të Vetingut. Sipas dokumentit, vlera totale e kontraktuar për periudhën e audituar është 46.464.536 lekë pa TVSH. Ajo përfshin komisionerët, personat e lidhur me ta, këshilltarët dhe punonjësit e KPK-së.
Procedura pa garë dhe sinjalizim me “flamur të kuq”
Sipas analizave të cituara, pothuajse të gjitha procedurat për këtë siguracion i ka fituar një kompani e vetme, “Sigal”. Dokumentet zyrtare të tenderave tregojnë se këto procedura janë zhvilluar pa garë dhe janë shënuar me “flamurin e kuq”.
Mbulim edhe për shërbime stomatologjike
KPK u formalizua në vitin 2017 dhe funksionoi deri në vitin 2024, me detyrë rivlerësimin kalimtar të gjyqtarëve dhe prokurorëve. Për shkak të rolit të tyre, ligjvënësi kishte parashikuar edhe siguracion gjithëpërfshirës për jetën dhe shëndetin.
Sipas burimit, procedurat e prokurimit për 12 anëtarët e KPK-së parashikonin mbulim shpenzimesh edhe për probleme stomatologjike, çka përshkruhet si e pajustifikuar për t’u financuar nga shteti.