Situata në rrugët e Tiranës u tensionua më 31 tetor gjatë protestës te Kryeministria, ku policia përdori gaz lotsjellës dhe ujë me presion, ndërsa drejt një autoblinde u hodhën molotov.
Sipas informacionit, forca të shumta policie ishin vendosur në gatishmëri te Kryeministria. Dy autobotë u pozicionuan aty dhe drejt protestuesve u hodh ujë me presion për t’i shpërndarë.
Droni i policisë ra mbi protestuesit
Dyshohet se droni i Policisë së Shtetit hidhte gaz lotsjellës nga ajri. Ai ra mbi protestuesit, ndërsa forcat e policisë u përpoqën t’i largonin qytetarët nga zona e Kryeministrisë.
Autoblindat në bulevard, protestuesit në rrugica
Policia vendosi autoblindat në bulevardin Dëshmorët e Kombit. Protestuesit u shpërndanë në rrugën Myslym Shyri dhe rrugicat përreth, ndërsa efektivët i ndoqën ata në këtë aks. Ndaj autoblindës së policisë u hodhën molotov.
Protesta e së premtes u cilësua si e 19-ta kundër kryeministrit Edi Rama.