Besimi në sektorin e ndërtimit në Shqipëri ra ndjeshëm në tetor 2026, sipas vrojtimit të Bankës së Shqipërisë. Treguesi i Besimit në Ndërtim u ul me 5.7 pikë përqindje brenda një muaji, rënia më e rëndë në të gjithë ekonominë, ndërsa kjo dobësoi edhe rritjen e Treguesit të Ndjesisë Ekonomike në vend.
Sektori i ndërtimit ka qenë për vite me radhë një nga motorët e ekonomisë, por të dhënat e fundit tregojnë një ngadalësim të porosive të reja. Balanca e kontratave porositëse u përkeqësua nga -15.0 pikë përqindje në shtator në -24.9 pikë në tetor.
Këtë e konfirmojnë edhe vetë firmat e ndërtimit. Pjesa e tyre që e quan “kërkesën e pamjaftueshme” faktor kufizues të aktivitetit u rrit në 45.93% në tetor, nga 42.75% në shtator. Sipas të dhënave, kjo sugjeron se blerësit po tërhiqen nga tregu i pasurive të paluajtshme.
Edhe aktiviteti aktual në kantiere ka nisur të humbasë ritëm dhe ka zbritur në 13.0 pikë. Përballë kërkesës më të dobët, ndërtuesit kanë ulur edhe pritjet për çmimet e ardhshme të apartamenteve, të cilat ranë në 11.8 pikë. Kjo mund të tregojë se tregu po shkon drejt një korrigjimi ose stabilizimi.
Sektori ende qëndron mbi mesataren e tij historike, falë rritjes së shpejtë të viteve të fundit, megjithatë të dhënat e tetorit shfaqin sinjalin e parë të një kthese.