Avokati Plarent Ndreca ka denoncuar se për të dytën herë nuk i është lejuar të hyjë në burgun e Fierit, për t’u takuar me klientin e tij, kryebashkiakun e Tiranës Erion Veliaj, që ndodhet në paraburgim. Ndreca i është drejtuar me shkresë drejtuesit të institucionit.
Në shkresë, avokati e quan këtë refuzim shkelje të së drejtës për mbrojtje dhe pengim të ushtrimit të detyrës së tij profesionale. Ai citon nenin 51 të ligjit, i cili sipas tij i garanton avokatit të drejtën të takohet me klientin në çdo kohë.
Ndreca paralajmëron se, nëse situata nuk zgjidhet, do t’i drejtohet oficerit të policisë gjyqësore për të depozituar kallëzim penal për shpërdorim detyre ndaj punonjësve që, sipas tij, mbajnë përgjegjësi për pengimin e takimit. Ai i kërkon drejtorit të burgut të ndërhyjë menjëherë dhe thekson se e drejta e mbrojtjes nuk varet nga vullneti apo interpretimi i punonjësve të institucionit.
Avokati shton se nuk ka pasur qëllim ta përshkallëzojë apo ta bëjë publike çështjen, por se përsëritja e pengesës e detyron të ndërmarrë veprime ligjore.
“Është hera e dytë që përsëritet e njëjta situatë. Edhe sot po pengohem të hyj në institucion dhe të takohem me klientin tim.”
Në letër ai shkruan se respektimi i ligjit nuk është çështje vullneti apo diskrecioni të punonjësve të institucionit, por detyrim.