Gjashtë persona janë arrestuar për dhunën gjatë protestës së djeshme në Tiranë, ndërsa tre të tjerë janë proceduar penalisht dhe dy janë shpallur në kërkim. Njoftimin e ka bërë Policia e Shtetit, sipas së cilës materialet procedurale iu referuan Prokurorisë edhe për veprën penale “Vrasja e punonjësit të Policisë”, e mbetur në tentativë.
Sipas Policisë, protestuesit kundërshtuan efektivët dhe i goditën me sende të forta, lëndë piroteknike, bomba molotov, sfera dhe vida metalike. Ata bllokuan gjithashtu qarkullimin dhe dogjën kazanë mbeturinash.
Të arrestuarit janë Sh., 26 vjeç, L. K., 18 vjeç, F. Ç., 38 vjeç, dhe K. R., 35 vjeç, shtetas i huaj, si dhe dy të mitur. Gjatë kontrolleve, L. K. dhe A. Sh. u gjetën me bomba molotov, të cilat iu sekuestruan.
Veprimet hetimore janë kryer nën drejtimin e Prokurorisë. Specialistët për Hetimin e Krimit vijojnë punën për dokumentimin e plotë të veprimeve të kundërligjshme dhe për identifikimin e personave të tjerë të përfshirë, me synim vënien e tyre përpara përgjegjësisë ligjore.
Materialet iu referuan Prokurorisë edhe për veprat “Organizimi dhe pjesëmarrja në grumbullime e manifestime të paligjshme”, “Prishja e qetësisë publike”, “Kundërshtimi i punonjësit të Policisë së rendit publik” dhe “Shkelja e rregullave mbi lëndët plasëse dhe djegëse”. Po ashtu, për “Pengimi i qarkullimit të mjeteve të transportit”, “Shkatërrimi i pronës me zjarr” dhe “Mbajtja pa leje dhe prodhimi i armëve shpërthyese dhe i municionit”.