Një qytetar ka denoncuar para një dege të Raiffeisen Bank në Tiranë se nga llogaria e tij janë marrë pa autorizim para në dy raste dhe se banka nuk ia ka kthyer të gjithë shumën. Ai pretendon se i mungojnë ende 4 mijë euro.
Denoncimi u bë përpara filialit pranë Komunës së Parisit, ndërkohë që aty policia kryente veprime hetimore për një grabitje me armë të raportuar në të njëjtën degë.
Qytetari tha para mediave se së pari kishte vënë re mungesën e 23 eurove. Pasi i njoftoi punonjësit e bankës, thotë se iu premtua që shuma do t’i kompensohej.
Disa muaj më pas, sipas tij, nga llogaria iu tërhoqën 7 mijë euro. Banka i ka kthyer 3 mijë euro, ndërsa 4 mijë të tjerat nuk i janë rimbursuar. Ai tha se prej dy vitesh përpiqet t’i marrë këto para, por pa rezultat, dhe pretendoi se punonjësit e filialit nuk e lejojnë më të hyjë në bankë.
“Këtu më kanë vjedhur mua llogarinë time… Më kompensuan 3 mijë euro, më thanë do të kompensojmë edhe 4 mijë euro. Ku janë paratë? Kam dy vjet që vij vërdallë”, deklaroi qytetari.
I revoltuar, ai tha se i është drejtuar edhe institucioneve të drejtësisë, por nuk ka marrë përgjigje. “Ku të ankohem, më thoni ju? Shkoj te drejtësia, drejtësia ngre duart lart”, u shpreh ai për “Syri Tv”.
Qytetari paralajmëroi se do t’u bashkohet protestave, duke e lidhur vendimin me pakënaqësinë për mënyrën se si po trajtohet ankesa e tij.