Protestat kundër qeverisë së Edi Ramës po raportohen nga mediat ndërkombëtare, ndër to Reuters, France 24 dhe The Times of Israel. Ato kanë pasqyruar përplasjet e 31 tetorit në Tiranë, përdorimin e molotovëve, ndërhyrjen e Policisë dhe kërkesat për largimin e kryeministrit.
The Times of Israel: nga tubimi paqësor te përshkallëzimi
Gazeta izraelite i referohet përplasjeve të mbrëmjes së 31 tetorit, hedhjes së molotovëve e gurëve dhe arrestimeve. Me fotografi të Associated Press, ajo përshkruan situatën përpara Ministrisë së Arsimit, ku tubimi nisi paqësisht, por u përshkallëzua me djegien e koshave të mbeturinave dhe hedhjen e sendeve të forta drejt efektivëve.
Sipas gazetës, kjo është sfida më e madhe për Ramën që nga viti 2013, kur erdhi në pushtet. Protestat nisën me kundërshtimin e një projekti turistik të lidhur me Jared Kushner dhe u zgjeruan me kërkesa kundër korrupsionit, problemeve në arsim dhe mungesës së perspektivës për të rinjtë.
Reuters dhe France 24
Reuters, në raportimet e 24 dhe 25 tetorit, ka përshkruar përplasjet mes protestuesve dhe Policisë, me gaz lotsjellës, autobotë me ujë dhe plumba gome. Agjencia e lidh mobilizimin e udhëhequr nga studentët me korrupsionin e perceptuar, mungesën e vendeve të punës dhe standardet e dobëta të arsimit.
France 24, me materiale nga AFP dhe Reuters, ka përcjellë shqetësimin e Bashkimit Europian për përshkallëzimin. BE-ja ka bërë thirrje për hetimin e pretendimeve për përdorim të tepruar të forcës nga Policia dhe për uljen e tensioneve nga të gjitha palët.
Mediat italiane dhe Le Monde
Agjencia ANSA ka raportuar për incidentet e 31 tetorit, ndërsa Sky TG24 dhe La Stampa kanë pasqyruar përplasjet me Policinë dhe kundërshtimin e një pjese të studentëve ndaj pjesëmarrjes së përfaqësuesve të Partisë Demokratike në tubim. Le Monde i ka kushtuar një analizë më të gjerë revoltës, duke e lidhur me pakënaqësitë ndaj qeverisjes dhe korrupsionin.