Kompania Qinglong Petroleum, dega shqiptare e një shoqërie me seli në Hong Kong, është vënë nën sekuestro nga administrata tatimore. Arsyeja është se, sipas të dhënave, nuk ka shlyer të paktën 100 milionë lekë (të vjetra) detyrime fiskale.
Emri i kompanisë shfaqet në hetimin e Prokurorisë së Fierit për koncesionarin e naftës “Bankers Petroleum”, sidomos për periudhën kur ky i fundit drejtohej nga Leonidha Çobo. Prokurorët dyshojnë për bashkëpunimin mes dy kompanive dhe e cilësojnë Qinglong si të regjistruar në një juridiksion që përdoret shpesh për strukturim korporativ me qëllime të errëta fiskale ose ligjore.
Më 12 tetor 2026, administrata tatimore i kërkoi Qendrës Kombëtare të Biznesit të vendoste masën e sigurimit, pra të mos lejohej tjetërsimi i aksioneve të shoqërisë “Qinglong Petroleum Technology and Engineering Company LLP Albania Branch”. Në dokument thuhet se shoqëria, me administrator Junlin Sheng, ka një detyrim të pashlyer prej 10.788.188 lekësh të reja.
Në shkresën e Tatimeve thuhet se kompanisë i është dërguar njoftimi për pagimin e detyrimit, por ai nuk është paguar. Drejtoria e Mbledhjes së Detyrimeve Tatimore të Papaguara kërkon që të mos lejohet tjetërsimi i pasurive, i të drejtave të tjera pasurore dhe i kuotave a aksioneve, deri në shlyerjen e detyrimeve.
Qinglong Petroleum është regjistruar në Shqipëri në dhjetor 2023, si degë e shoqërisë “China International Zoom Material Co Limited” nga Hong Kongu. Administratorë dhe përfaqësues ligjorë janë Jiang Yijun dhe Junlin Sheng.
Prokuroria e Fierit nisi hetimet në dhjetor 2024 për vepra penale si fshehja e të ardhurave, pastrimi i produkteve të veprës penale, shpërdorimi i detyrës dhe moskryerja e detyrave nga organet tatimore. Në qendër të hetimit është veprimtaria financiare e Bankers Petroleum nga viti 2015 e tutje. Prokurorët dyshojnë se koncesionari ka fryrë në mënyrë fiktive shpenzimet për të shmangur detyrimet ndaj shtetit, ndërsa Çobo, administrator i gjatë i kompanisë, shihet si figura kyçe e hetimit.
Gjatë hetimit u ngritën dyshime se pothuajse gjithë zinxhiri drejtues i Bankers ishte përfshirë në një skemë pastrimi parash prej miliona eurosh, megjithëse shuma e saktë nuk është përcaktuar. Prokuroria identifikoi një numër të lartë kompanish që dyshohet se kanë shërbyer për pastrimin e parave, mes tyre edhe Qinglong.
Në dosjen e paraqitur në gjykatë në korrik 2025, për arrestimin e të paktën 14 personave, shqiptarë e të huaj, thuhet se pronar përfitues i Qinglong është “China International Zoom Material Co. Limited”. Sipas të dhënave hetimore, kompania fillimisht kishte vetëm administratorin e punësuar. Në vitin 2024 stafi arriti në 24 persona, kryesisht nga Kina, ndër ta 10 që nuk kanë qenë kurrë në Shqipëri, por rezultojnë të paguar rregullisht.
Prokurorët dyshojnë për aktivitetin real të kompanisë, pasi sipas akteve në vitin 2024 ajo ka realizuar fitim prej rreth 1.3 milionë eurosh, me klientë vetëm “Bankers Petroleum” dhe “Albdrilling” sha. Edhe kjo e fundit përmendet si pjesë e skemës së dyshuar të pastrimit të parave me Bankers.