Vlerë Gjakova është emëruar këshilltare pranë Kryeministrisë, me detyrë çështjet e medias dhe strategjinë e komunikimit të institucioneve qeveritare. Emërimin e ka bërë kryeministri Edi Rama. Sipas informacioneve nga burime qeveritare, ajo e ka nisur zyrtarisht punën rreth dy javë më parë.
Emërimi është shoqëruar me një njoftim të brendshëm për administratën e ministrive. Në një email të Vilma Gurit, sekretare e përgjithshme në Kryeministri, sekretarëve të përgjithshëm u kërkohet që këshilltarët e medias në çdo dikaster të zhvillojnë takime me Gjakovën dhe t’i paraqesin asaj strategjitë e tyre të komunikimit. Mekanizmi pritet të shërbejë për koordinimin e komunikimit institucional në nivel qeveritar.
Gjakova është e lindur në Maqedoninë e Veriut dhe ka përvojë të gjatë profesionale në Kosovë. Në profilin e saj në LinkedIn prezantohet si strategiste e medias dhe e komunikimit. Ajo ka komentuar zhvillimet politike në Kosovë e Shqipëri dhe është shfaqur në Top Channel, në rubrikën “Rrethi Katror” të emisionit “E Diell”, të moderuar nga Edi Manushi.
Rreth tetë vite më parë, Gjakova iu bashkua Lëvizjes Vetëvendosje, të drejtuar nga Albin Kurti. Në zgjedhjet parlamentare të vitit 2019 ajo kandidoi për deputete me siglën e kësaj partie, siç ka bërë të ditur edhe vetë në rrjetet sociale.
Në profilin e saj deklaron 18 vite përvojë në strategji mediash, komunikim dhe marrëdhënie me publikun. Ajo e përshkruan veten edhe si eksperte të energjisë së rinovueshme dhe publiciste, me fokus te komunikimi strategjik, qytetet e zgjuara e të gjelbra dhe ekosistemet digjitale.
Ka përfunduar studimet Bachelor në Komunikim dhe Gazetari në Institutin Maqedonas për Media (MIM), si dhe studime në Ekonomi dhe Tregti Ndërkombëtare. Ka një master në Filozofi dhe Psikanalizë pranë Qendrës Kërkimore për Filozofinë Greke dhe një tjetër në Metafizikë, Epistemologji dhe Filozofi Morale e Politike në Universitetin Aristotel të Selanikut.
Përvoja e saj përfshin sektorin publik, atë privat dhe shoqërinë civile. Ka qenë zëdhënëse dhe përgjegjëse e marrëdhënieve me publikun në EVN Maqedoni, ka pasur angazhime me Komunën e Çairit dhe organizatën VEPRO! (ACT), si dhe bashkëpunime me Coca-Cola Ltd Kosovo dhe Rrjetin Ballkanik për Gazetari Investigative (BIRN). Ajo ka publikuar shkrime edhe në Observatorin Evropian të Gazetarisë dhe është angazhuar për të drejtat e njeriut, të drejtat civile dhe lëvizjen feministe.
Me këtë emërim, Rama i ka besuar një rol që synon koordinimin e strategjive të komunikimit të ministrive. Këshilltarët e medias të dikastereve do të duhet të bashkërendojnë punën me këshilltaren e re të Kryeministrisë.